كفة الأم..بقلم دياب محمود حسن

كفة الأم
*****
صبح الصباح
قوم يا واد للمدرسة
اصبري شوية يا ماما
الدنيا لسة مدخششة
قوم بطل كسل وللا
اجيب المكنسة
قوم يللا افرك عينيك
اتوضا وصلى وارفع
إيديك
اطلب من ربك يوفقك
تروح طب أو هندسة
وأنا أسوق فى الدسدسة
تشد الغطا وتقول قوم
يا واد بقا وبطل أبلسة
ترفعنى بين إيديها
وتاخدنى فى حضنها
وتنزل فى ودنى وشوشة
أنا مجهزة لك بيض وجبنة
وكمان الفول مدمسة
وأنا أدلع عليها واقول مش
عايز سيبينى اغيب م المدرسة
مرة واحدة فى ظرف ثانية
 ألاقيها قلبت واحدة
تانية تشخط وتروح مبوزة
وتقول خلاص أنا هاروح أصحى
أبوك
أبوس إيديكى بلاش يا ماما خلاص
هاروح  المدرسة
وفضلت أكبر بين إيديها وهىَّ
تنططنى  من سنة للتانية
لغاية  ما تقلت عليها
وهى مش قادرة ترفعنى بإيديها
قالت يا واد إنت كبرت اعتمد
بقا على نفسك
قلت مش قادر أنا اتعودت على
لمسك وهمسك
انت من الولادة أم ودادة انت ف حياتى
كل حاجة شيلتينى ورضعتينى وعملتى
إيدك ليَّ وسادة
أمك نن شالك
 قلب حبك حضن ضمك
أوعى فى يوم تيجى واحدة تقول
يا إما أنا يا إما أمك
دياب محمود حسن